I lei vul lai tawi mang e rûn hlimtu,
Riang hlei tahna pêlin i rûang i thlâu;
Khawiah chuan tuan ta maw i rûang lumtu?
I chhingmit i chhing, i sakhming kan âu,
Biak i chhang si lo maw khawnge i awm?
I sakhming lam zelin kan râwl a châu.
Kan hre ta, i kal pêl ta tisa hnâwm.
I hmu ta hringfa zawn nat tin damdawi,
Chu hmun chu nunna thing rahin a bâwm.
Pialral khartung rangkadara chei mawi,
"Sâwn r'u," tiin Lalber thupek a chhuak;
Chung khuaa siali haw tur thu angel chawi.
Mawi tâwk lo em ni, an sawi Vanram mawi?
Hring khua lungmawi kher an lak leh tâk chu!
Vanram mawi chu mawi nâng che Vanrammawi.
I fak leh chawimawi chu chung van Pathian,
Chu Pathian chu i chatuan chawlhna thing thiang.
